শক্তিশালী শত্ৰুৰ বাবে শক্তিশালী কৌশল
আফ্ৰিকাৰ অৰণ্যত সততে দৃষ্টিগোচৰ হোৱা চিতা বাঘ পৃথিৱীৰ ভিতৰতে এটা দ্ৰুতবেগী জন্তু হিচাপে পৰিগণিত৷ একোটা চিতা বাঘে ঘণ্টাত প্ৰায় ৮০-১২০ কিলোমিটাৰ দূৰত্ব অতিক্ৰম কৰিব পাৰে৷ ৩-৫ ছেকেণ্ডৰ ভিতৰতে চিতা বাঘে ৫০-৬০ মাইল প্ৰতি ঘণ্টাৰ বেগত উপনীত হ'লেও আচৰিত হ'বলগীয়া কথা নহয়৷
পিছে শক্তিশালী শত্ৰু বাঘৰ এই কৌশলবোৰ হৰিণেও বুজি পায়৷ বহুশতিকাজোৰা চিকাৰ-চিকাৰীৰ খেলখনৰ অন্তত, আৰু বাঘৰ নানানটা কৌশল দেখি-শুনি হৰিণে নিজাববীয়াকৈ কিছুমান কৌশল সৃষ্টি কৰি লৈছে৷ তেনে এটা কৌশল হৈছে-'Stotting'৷
হৰিণটোৱে যেতিয়া চোপ লৈ থকা বাঘটোক দূৰৈত দেখা পায়, তেতিয়া হৰিণটোৱে চাৰিওটা ঠেং শূন্যলৈ দাঙি থকা ঠাইতে জাঁপ কেইটামান মাৰে৷ বহু ওপৰলৈ মৰা এই জাঁপকেইটাৰে হৰিণটোৱে বাঘক প্ৰতীকীভাষাৰে ইয়াকে বুজাব খোজে যে-'দেখিছ, মোৰ চাৰিওখন ঠেঙেই শক্তিশালী, সমৰ্থৱান আৰু অক্ষত৷ ইচ্ছা কৰিলে এতিয়াই এই চাৰিওখন ঠেঙৰ সহায়ত দৌৰ মাৰি মুহূৰ্ততে ধুবুৰী পাবগৈ পাৰোঁ৷ গতিকে মোৰ লগত জেং নকৰিবি৷ মোৰ পিছ নল'বি৷ পাত্তা নাপাবি৷'
চিতা বাঘ হৰিণৰ এই বুদ্ধিদীপ্ত কৌশলটোত ধৰাশায়ী হৈ পৰে৷ সেয়েহে, বাঘে এইদৰে জঁপিয়াই থকা হৰিণৰ পাছ নলয়৷ আনকি যদি শাৰীৰিকভাৱে দুৰ্বল হৰিণ এটাও সামান্য পৰিশ্ৰম কৰি এইদৰে জাঁপ কেইটামান মাৰিব পাৰে, তেন্তে সি বাঘক বিভ্ৰান্ত কৰিবলৈ সক্ষম হ'ব৷
চিতা বাঘ আৰু হৰিণৰ এই ঘটনাৱলীটোৰ পৰা মানুহে শিকিবলগা দুটা প্ৰধান কথা হৈছে-
(১) শত্ৰুক দেখি ভয় নাখাব৷ শক্তিশালী শত্ৰুক পৰাভূত কৰিবলৈও শক্তিশালী কৌশল আছে৷ উপযুক্ত কৌশলৰ সহায়ত মানসিক পৰ্যায়তেই কেতিয়াবা জয় সাব্যস্ত কৰিব পাৰি৷
(২) সকলো মানুহৰে দুৰ্বলতা আছে৷ কিন্তু মানুহক নিজৰ দুৰ্বলতাবোৰ দেখুৱাই থাকিলে আপুনি এক বিপদৰ চাকনৈয়াত সোমাই পৰিব৷ বিশেষকৈ মানসিকভাৱে শক্তিশালী হৈ থকাটো আজিৰ তাৰিখত বৰ প্ৰয়োজনীয়৷ গতিকে পৰাপক্ষত নিজকে মানসিকভাৱে দৃঢ় কৰক৷ জীৱনৰ শক্তিশালী বিপদবোৰ অতিক্ৰম কৰিবলৈ নিজকে শক্তিশালী হিচাপে গঢ়ি তোলক৷
Comments
Post a Comment